Star Wars Revelations á að gerast á milli Episode III og IV og skýra frá atburðum sem gerast á milli kvikmyndanna tveggja. Aðalsöguhetjan er Taryn Anwar sem tekist hefur að brjótast undan oki Veldisins og freistar þess að ná höndum yfir máttugan Jeda grip.

Ótrúlegt þykir að hægt sé að ráðast í þvílíkt stórvirki, sem kvikmyndagerðarmennirnir á bak við Star Wars Revelations takast á við. Stuttmyndin er um 40 mínútur á lengd og full af fjöri og öllu sem einkennir Star Wars kvikmynd. Í myndinni koma fyrir þekktir skúrkar á borð við Palpatine og Darth Vader ásamt mörgum geimverum sem við þekkjum úr Star Wars.

Á bak við myndina er hópur sjálfboðaliða frá ýmsum heimshornum sem unnu saman til þess að gera myndina að raunveruleika. Hópurinn kallar sig Panic Struck Productions og myndin er unnin sem Non-profit, þ.e. myndin sjálf er alveg ókeypis.Við gerð myndarinnar var notuð kvikmyndatökuvél að gerðinni Canon XLS1 sem var einn dýrasti kostnaður við myndina eða um 4500 dollarar.

Samkvæmt heimasíðu hópsins á Panicstruckpro.com, þá var vélin sem notuð var keypt á uppboðsvefnum Ebay.Slíkt myndi ekki þykja mikið við gerð stuttmyndar með kvikmyndagæðum, en sá kostnaður fer lækkandi og Ebay gerir kvikmyndamönnum nútímans og framtíðarinnar auðveldar að fá tæki á hagstæðu verði.

Hinn ósýnilegi kostnaður er sá kostnaður sem fer í að vinna að stuttmynd án launa og annars kostnaðar. Um 200 manns unnu að myndinni og var hún gefin út vorið 2005 á vef Panicstruckpro.Mikill tími og skipulag getur farið í að gera stuttmynd af þessari gerð og sem dæmi um Revelations þá tók þrjú ár að gera myndina. Fyrir þá mörgu Star Wars aðdáendur sem unnu að myndinni þá hefur sá tími verið þess virði.

Myndin er gott dæmi um hvernig hópur af fólki getur unnið saman og látið drauminn rætast með eigin stuttmynd eins og Star Wars Revelations.